Kvikuinnskot í Eyjafjarðarál ?

Tjörnesbrotabeltið / Leave a Comment
Birta á :

Skjálftar úti fyrir NorðurlandiMargt bendir til þess að kvikuinnskot undir Eyjafjarðarál orsaki mikinn fjölda smáskjálfta sem þar hafa mælst undanfarna daga.  Þessi mikli fjöldi tiltölulega lítilla skjálfta, allir undir M3 af stærð, er óvenjulegur en ætla mætti að stærri skjálftar fylgdu með.  Þeir  hafa hinsvegar ekki orðið.  Skjálftarnir eru ennfremur á nokkuð afmörkuðu svæði og meirihluti þeirra á 10-12 km dýpi sem bendir til kvikuinnskots eins og fram kom í viðtali við jarðeðlisfræðing í hádegisfréttum Rúv í dag.

Öflugar jarðskjálftahrinur hafa orðið undanfarin misseri á brotabeltunum úti fyrir Norðurlandi og er þetta etv. eðlilegt framhald á þeirri virkni.  Innskot í jarðlög á um 10 km. dýpi boðar ekki eldgos, það er amk. mjög ólíklegt.  Staðreyndin er að mikill meirihluti kviku storknar djúpt í jörðu sem innskot án þess að ná nokkurntímann til yfirborðs.  Að sjálfsögðu er þó rétt að fylgjast vel með þessari virkni.

130 ár frá eldgosinu mikla í Krakatá

Eldfjöll erlendis
Birta á :
Anak Krakatoa
Myndi er frá litlu gosi í Anak Krakatoa árið 2008

Krakatá (Krakatoa) er eyja á milli tveggja stærstu eyja Indónesíu, Súmötru og Jövu.  Eldgos hófst á Krakatá í maí 1883 og fram í ágúst sama ár gaus kröftuglega með hléum.  Jarðskjálftar og höggbylgjur frá gosinu riðu yfir nágrennið.  Þann 26. ágúst herti gosið mjög og náði gosmökkurinn 25 km hæð með tilheyrandi öskufalli í Indónesíu.

Morguninn eftir, þann 27. ágúst kváðu við fjórar gríðarlegar sprengingar og eyjan Krakatá hreinlega splundraðist.  Svo mikill var krafturinn í sprengingunum að þær heyrðust til borgarinnar Perth í Ástralíu sem er í 3.100 km. fjarlægð.  Risavaxnar flóðbylgjur (tsunami) sem náðu allt að 40 metra hæð skullu á eyjunum í kring og urðu amk. 36.000 manns að bana.

Þetta er eitt af allra mestu eldgosum sem mannkynið hefur orðið vitni að.  Árið eftir kólnaði veðurfar um allan heim vegna ösku í háloftunum og varð ekki eðlilegt fyrr en 5 árum síðar.

Eyjan Krakatá  minnkaði mikið og breyttist í kjölfar gossins, askja myndaðist sem er um 300 metra djúp og um 6km í þvermál.  Eyja myndaðist í öskjunni í  gosi árið 1930 sem nefnd var Anak Krakatoa eða barn Krakatá og hefur gosið af og til síðan.

Lítið hlaup úr Lóni í Kverkfjöllum

Kverkfjöll / Leave a Comment
Birta á :

Frá KverkfjöllumJökulstíflað lón í Kverkfjöllum við Vatnajökul sem heitir Gengissig hefur hlaupið síðustu daga í ána Volgu og þaðan í Jökulsá á Fjöllum.  Hlaupið er lítið en hafði þó það af að taka af göngubrú yfir Volgu.  Ekki varð meira tjón af völdum hlaupsins og í raun var rennsli í Jöklulsá á Fjöllum ekki meira en á hlýjum sumardegi í hlaupinu.

Mikill jarðhiti er í Kverkfjöllum, ekki síst undir umræddu lóni.  Hefur það hlaupið nokkrum sinnum svo vitað sé.  Ummerki eru  um gufusprengingar eftir hlaup þar sem stafa af snöggum þrýstingslétti.

Lengi var talið að Kverkfjöll væru afkastamikil eldstöð sem hafi gosið alloft eftir landnám.  Nýjustu rannsóknir benda hinsvegar til þess að Kverkfjöll hafi í raun alls ekki gosið eftir landnám og í raun sjaldan á nútíma.  Flest eða öll þau öskulög sem menn eignuðu Kverkfjöllum hafa eftir rannsóknir reynst koma frá Grímsvötnum eða Bárðarbungu.  Hinsvegar eru merki um mikil forsöguleg gos og stórhlaup frá Kverkfjöllum en það eru mjög gamlar gosmenjar.  Jarðskjálftavirkni er þó alltaf nokkur á svæðinu.

Fréttir í fjölmiðlum um hlaupið:

mbl.is – Hlaup úr Gengissiginu

Dv.is – Lítilsháttar jökulhlaup úr Kverkfjöllum

Smáskjálftar aukast á ný í Kötlu

Katla / Leave a Comment
Birta á :
Nýlegir skjálftar í Kötlu
Nýlegir skjálftar í Kötlu

.

.

 

Nú virðist vera farin í gang hefbundin síðsumars og haustvirkni í Kötlu eins og sjá má á meðfylgjandi mynd sem fengin er af vef Veðurstofunnar.  Smáskjálfta virkni hefur verið undanfarna sólarhringa bæði í Kötluöskjunni og undir Goðabungu.  Búast má við áframhaldandi smáskjálftavirkni næstu mánuði en ekkert bendir enn til frekari tíðinda í Kötlu.

Undanfarnir mánuðir hafa verið með afbrigðum rólegir hvað jarðskjálftavirkni varðar á og við landið og fátt fréttnæmt gerst.  Smáskjálftar hafa þó verið í víð og dreif eins og endranær , helst á Suðurlandi, úti fyrir Norðurlandi og í norðanverðum Vatnajökli.

Mayon á Filippseyjum veldur usla

Eldfjöll erlendis
Birta á :

Þegar lítið er um að vera hér á landi er ekki úr vegi að fræðast aðeins um eldfjöll erlendis.  Á Filippseyjum eru fjölmörg eldfjöll enda eyjaklasinn á hinu svokalla eldbelti “ring of fire” sem umlykur Kyrrahafsflekann svokallaða.  Virkasta eldfjall Filippseyja er hin 2462 metra háa eldkeila Mayon sem þykir einstaklega regluleg í laginu.

Þann 7. maí síðastliðinn komst Mayon í fréttirnar þegar þar  fórust 5 fjallgöngumenn  þegar lítið sprengigos ,eða öllu heldur ein stök sprenging, varð í fjallinu. Vitað er um 48 gos í Mayon á síðustu 400 árum.  Nýleg gos í Mayon: 2009-10, 2008, 2006, 1993, 1986 og 1984.  Mayon hefur oft valdið dauðsföllum og tjóni enda allmikil byggð í héröðum nærri fjallinu.  Þá fylgja gjóskuflóð gjarnan eldgosum í Mayon en þau eru einhver hættulegustu fyrirbrigði sem fylgja eldgosum.

Á meðfylgjandi mynd má einmitt sjá gjóskuflóð æða niður hlíðar Mayon í eldgosi árið 1984.

Mayon_Volcano

 

 
Scroll to Top