Grímsvötn

Lítið hlaup úr Grímsvötnum

.

Allt bendir til þess að lítið hlaup sé hafið úr Grímsvötnum í Vatnajökli. Mun það væntanlega koma fram í ánni Gígju síðar í dag.  Eftir Grímsvatnagosið og stórhlaupið 1996 breyttust aðstæður í Grímsvötnum þannig að hlaupin eru minni og meinlausari en áður.  Eldgosið í fyrra hafði ekki teljandi áhrif enda fylgdi því ekki hlaup.

Frétt Ruv um hlaupið: Lítið hlaup hafið í Grímsvötnum

Gosinu að ljúka

Nú að morgni miðvikudags 25.maí virðist eldgosinu í Grímsvötnum vera lokið eða í þann mund að ljúka.  Aðeins gufubólstrar stíga nú upp frá eldstöðinni.  Þetta var því stutt en mjög öflugt gos að því gefnu að því sé lokið.  Þó er ekki hægt að útiloka að það taki sig upp aftur en varla af þeim krafti sem var í gosinu um helgina.

STÓRGOS Í GRÍMSVÖTNUMÖSKUFALL MJÖG VÍÐA

Eldgosið sem nú stendur yfir í Grímsvötnum er stórgos og eitt af öflugustu eldgosum sem hér hafa orðið  í yfir 100 ár.

Krafturinn í gosinu var þegar hann var mestur áætlaður 10-20 sinnum meiri en krafturinn í gosinu í Eyjafjallajökli fyrir rúmu ári síðan.  Er þá miðað við áætlað gosefnamagn sem eldstöðin lætur frá sér á tilteknu tímabili.  Má ætla að aðeins Kötlugosið 1918 og Heklugosið 1947 séu sambærileg við þetta gos hvað sprengikraft varðar sé litið til gosa á þessari öld og síðustu.   Gosmökkurinn náði um tíma 20 kílómetra hæð sem er mesta hæð sem gosmökkur hefur náð síðan í upphafi Heklugossins 1947.  Gríðarlegur fjöldi eldinga hefur mælst í gosmökknum, yfir 2000 á klukkustund þegar mest var í nótt.  Hér hefur Veðurstofan sett upp vefsvæði sem sýnir tíðni eldinga yfir gosstöðvunum.   Athyglisvert er að fylgjast með gosóróanum á mælum Veðurstofunnar.  Á kortinu er smellt á punktinn á vestanverðum Vatnajökli en þar eru Grímsvötn.

Þrátt fyrir að rúmur sólarhringur sé liðinn frá því gosið hófst þá hefur ekki tekist að komast nærri gosstöðvunum en ca 30 km. og því ekki enn  vitað nákvæmlega hve löng gossprungan er en það getur skipt nokkru máli upp á hugsanlegt hlaup.  Þó er ekki talið að stórhlaup sé yfirvofandi því stutt er síðan hljóp úr Grímsvötnum og því ekki mikið vatnsmagn í þeim.

Gos í Grímsvötnum eru venjulega öflugust í upphafi en svo dregur úr þeim og yfirleitt standa þau ekki lengi yfir.  Hitt verður þó að athuga að þetta gos er gríðarlega öflugt og gæti því staðið lengur fyrir vikið.  Í flestum tilvikum eru Grímsvatnagos tiltölulega saklaus og lítil en það á svo sannarlega ekki við nú.   Einnig verður forvitnilegt að sjá hvaða breytingar verða á eldstöðinni í kjölfar gossins því stærð þess er þess eðlis að það gæti breytt landslagi við Grímsvötn og þeirri hefðbundnu rútínu sem Grímsvatnahlaup hafa verið í.  Mjög öflug gos geta einnig valdið landsigi undir eldstöðinni (öskjumyndun) en ekkert bendir þó til þess að það sé að eiga sér stað nú.

Öskufall hefur orðið mjög víða um landið, mest þó sunnan og suðaustan lands.  Undir kvöld lagði mökkinn vestur og náði höfuðborgarsvæðinu um kvöldmatarleytið.  Myndirnar hér að neðan voru teknar á suðurlandi í dag.

Hér er Youtube videó tekið skömmu eftir gosbyrjun

httpv://www.youtube.com/watch?v=oMStcqHfwQ4

ELDGOS HAFIÐ Í GRÍMSVÖTNUM

ELDGOS HÓFST Í GRÍMSVÖTNUM UM KL. 18 Í DAG.  Tiltölulega rólegt hefur verið undanfarnar vikur á skjálftamælum á þessum slóðum sem og annarsstaðar á landinu svo segja má að gosið hafi komið nokkuð á óvart.  Hinsvegar hefur verið búist við gosi í nokkurn tíma í Grímsvötnum sem eru virkasta eldstöð landsins

Gosið virðist að sögn sjónarvotta nokkuð öflugt en nánari fréttir liggja ekki fyrir þegar þetta er ritað.  Mikil jarðskjálftavirkni hefur fylgt upphafi gossins og vekja staðsetningar skjálfta suðvestan Vatnajökuls nokkra athygli en þetta geta verið skekkjur i mælitækjum sem oft gerist þegar öflugar skjálftahrinur ganga yfir.  Hér er jarðskjálftagraf Veðurstofu Íslands af Vatnajökli og nágrenni.  Myndin er einnig fengin þaðan.

Síðast gaus í Grímsvötnum árið 2004 og þar áður 1998.  Bæði þessi gos voru smá en hinsvegar var gosið tveim árum áður, 1996 allmikið.

Nánari fréttir af gosinu eru væntanlegar eftir því sem þær berast en hér má lesa um Grímsvatnaeldstöðina.

Jarðhræringar við Grímsvötn

Samkvæmt upplýsingum frá Veðurstofunni varð jarðskjálfti sem mældist af stærðinni 4,2 við Grímsfjall í Vatnajökli í morgun.  Skömmu áður varð skjálfti upp á 3,5.  Búist hafði verið verið gosi á þessum slóðum í byrjun nóvember á síðasta ári þegar hlaup varð úr Grímsvötnum en það gerðist ekki.  Þarna er virkasta eldstöð landsins og jarðskjálftar algengir.  Nokkur órói hefur verið viðvarandi í eldstöðvum í Vatnajökli undanfarið, sérstaklega við Grímsvötn og Bárðarbungu.  Einnig hafa orðið skjálftahrinur við Esjufjöll austarlega í jöklinum og þá mælast skjálftar af og til við Kverkfjöll í norðurbrún jökulsins.  Ekki er  talið að eldgos sé beinlínis yfirvofandi á þessum slóðum en Grímsvötn þó hvað líklegust.

Scroll to Top