Óvissustig vegna hræringa í Heklu

Hekla / Leave a Comment
Birta á :

Ríkislögreglustjóri og lögreglustjórinn á Hvolsvelli hafa lýst yfir óvissustigi Almannavarna vegna jarðhræringa í og við Heklu.  Eitthvað hefur verið um djúpa jarðskjálfta undanfarið við fjallið en kvikuhreyfingar mælast þó ekki.    Ekki er talið að gos sé endilega yfirvofandi en vandamálið með Heklu er að aðdragandi að gosi er yfirleitt mjög stuttur, nokkrir klukkutímar eða jafnvel enn styttri.  Með nýjum tækjabúnaði sem settur hefur verið upp síðustu ár er markmiðið að greina hættuna fyrr en þar sem þessi tæki voru ekki til staðar fyrir síðustu gos í fjallinu þá er ekki nákvæmlega vitað hvernskonar jarðskorpuhreyfingar eru undanfari goss.

Hekla gaus síðast árið 2000 og hafði þá gosið á 10-11 ára fresti frá árinu 1970.  Vitað er að þrýstingur undir eldstöðinni er orðinn meiri en hann var fyrir síðasta gos svo það ætti ekki að koma neinum á óvart  ef gos hefst á næstunni.  Verði gos í Heklu þá verður það að öllum líkindum hefðbundið fremur lítið gos eins og þau hafa verið síðustu áratugi, etv. nokkuð kraftmikið í fyrstu en dregur fljótt úr því og ólíklegt að það komi til með að valda meiriháttar skaða.

Í Júlí 2011 urðu einnig óvenjulegar hreyfingar við Heklu sem ekkert varð meira úr.

Fréttir af hræringunum í Heklu í fjölmiðlum:

Ruv.is:  Engin bráðahætta á eldgosi

Dv.is: Óvissustig vegna óvenjuegra hreyfinga í Heklu

Mbl.is: Óvissustig vegna Heklu

 

Fallegt gos í Etnu

Eldfjöll erlendis / Leave a Comment
Birta á :

Eldfjallið Etna á Sikiley er virkasta eldfjall Evrópu og hóf að gjósa þann 19.febrúar síðastliðinn.  Etna er jafnframt hæsta virka eldfjall Evrópu, 3329 metra hátt.  Algengustu gosin í Etnu eru róleg, meinlaus og falleg flæðigos þar sem hraunið liðast um hlíðar fjallsins.  Etna á sér þó einnig sögu um mikil hamfaragos sem hafa kostað mörg mannslíf.  Hér er myndband frá gosinu sem hófst í síðasta mánuði.

httpv://www.youtube.com/watch?v=oMrsdL_IhRM

Jarðskjálftar á ný í Eyjafjarðarál

Tjörnesbrotabeltið / Leave a Comment
Birta á :

.

Í nótt varð skjálfti upp á 3,8 stig um 14 km norðvestur af Gjögurtá, eða a svipuðum slóðum og stóri skjálftinn varð í október síðastliðnum.  Það hafa verið viðvarandi smáskjálftar á þessum slóðum síðan en þessi er sá stærsti i langan tíma.  Á annan tug eftirskjálfta hafa mælst.  Stærsti skjálftinn í nótt fannst í byggðarlögum næst upptökunum þ.e. Siglufirði, Ólafsfirði, Dalvík og reyndar einnig á Húsavík.

Það er því ljóst að umbrotahrinunni í Eyjafjarðarál er ekki lokið og má búast við að þetta haldi eitthvað áfram.  Hrinan hefur enn sem komið er ekki haft áhrif á Tjörnes brotabeltið en það er það sem menn hafa helst haft áhyggjur af enda geta orðið mjög harðir skjálftar á því svæði.

Myndin er fengin af vef Veðurstofu Íslands

Fréttir í fjölmiðlum af skjálftanum:

Ruv.is – Snarpur jarðskjálfti nyrðra

Mbl.is – Jarðskjálfti undan Gjögurtá

Viðvarandi spenna á Krýsuvíkursvæðinu – Gæti endað með gosi

Reykjanesskagi / Leave a Comment
Birta á :

Á mbl.is í dag er að finna fróðlegt viðtal við Ara Trausta Guðmundsson jarðfræðing.  Þar kemur fram að spenna hefur byggst upp undanfarin ár við suðurenda Kleifarvatns og á Sveifluhálsi og er ástandið viðvarandi.  Landris hefur mælst á þessum slóðum og þó þess sé ekki getið í viðtalinu þá má leiða líkum að því að það stafi af kvikusöfnun neðanjarðar.  Á síðasta ári urðu auk skjálfta á Krísuvíkursvæðinu, skjálftar við Grindavík og öflug hrina á Bláfjallasvæðinu.  Nú í janúar varð svo allsnarpur skjálfti við Keili.

Eins og fram kemur í viðtalinu við Ara Trausta þá verða goshrinur á Reykjanesskaganum á ca 500-1000 ára fresti.  Síðustu staðfestu gos á svæðinu urðu um árið 1240 og því eru rúm 770 ár liðin frá því Reykjanesskaginn lét síðast að sér kveða.  Þrátt fyrir þennan óróa á skaganum undanfarin ár þá gætu enn liðið margir áratugir, jafnvel aldir áður en goshrina hefst því eldstöðvar geta verið mjög lengi að undirbúa gos.  Órói hófst í Eyjafjallajökli um 15 árum fyrir gosið, Bárðarbunga hefur verið óróleg í 40 ár og Katla er með reglulega tilburði án þess að til goss komi svo dæmi séu tekin.  En vegna nálægðar eldstöðva á Reykjanesskaga við þéttbýlasta svæði landsins er nauðsynlegt að rannsaka eldstöðvarnar mjög vel og hafa fullunna viðbragðsáætlun til staðar svo eldgos komi fólki ekki í opna skjöldu þegar og ef til þess kemur.

Meðfylgjandi mynd er tekin við hverasvæðið í Krýsuvík sem er mjög virkt.

 

Jarðskjálfti við Keili

Reykjanesskagi / Leave a Comment
Birta á :

Jarðskjálfti varð laust fyrir kl. 1 í nótt skammt norðaustur af Keili á Reykjanesskaga.  Mældist hann um 3,1 af stærð og á rúmlega 6 km dýpi.  Tveir minni eftirskjálftar hafa mælst.  Skjálftinn fannst sumstaðar á Höfuðborgarsvæðinu, best þó í Hafnarfirði enda næst upptökunum.

Skjálftar eru mjög algengir á Reykjanesskaga en þó ekki nákvæmlega þarna.  Þessi skjálfti er nokkuð austar en meginsprungusveimur Krísuvíkursvæðisins við Sveifluháls.  Ekki er þó hægt að draga neinar sérstakar ályktanir af því enda geta jarðskjálftar orðið svo til allsstaðar á skaganum.

Fréttir af skjálftanum í fjölmiðlum:

Visir.is  – Jarðskjálfti við Keili

Mbl.is – Jarðskjálfti fannst á höfuðborgarsvæðinu

Ruv.is – All snarpur skjálfti á Reykjanesskaga
Scroll to Top